Националниот совет за родова рамноправност традиционално, веќе 23 години, го одбележува верскиот празник Велигден со пригодна велигденска трпеза. Производите кои ги подготвуваат жените - членки на НСРР (СОЖМ) се изложуваат пред Соборниот храм „Св. Климент Охридски“ и се продаваат за собраните средства да се искористат во хуманитарни цели.

Оваа година собраните средства ќе бидат искористени за матурантите од Домот за деца без родители и родителска грижа „11 Октомври“ во Скопје.

Националниот совет за родова рамноправност во рамки на Програмата за политичко зајакнување на жените во март 2014 реализира 7 обуки во 7 рурални општини во РМ со жени од политичките партии кои се центарски и десно ориентирани.

Цели на обуките се: зголемување на застапеноста на жените во политичките партии, како и на повисоки позиции во политичките партии, зголемување на учеството на жените во процесите на донесување на одлуки, вклучување на приоритетите, потребите и интересите на жените во програмите и политиките на политичките партии и вклучување на родовата перспектива во програмите и политиките на политичката партија.

Настаните се поддржани од Фондацијата Конрад Аденауер, канцеларијата во Скопје.

Фотографии може да погледнете овде.

На 8. март, по повод Денот на жената, НСРР оствари средба со министерот за економија на Република Македонија, г-динот Ваљон Сарачини.

На средбата се разговараше за досегашната поддршка на жените-претприемачи што ја дава Министерството за економија, а беа претставени и активностите на НСРР во контекст на Програмата за економско зајакнување на женитe, чија стратешка цел е подобрување на социо – економската положба на жените.

Меѓу целите се вбројуваат намалување на невработеноста и сиромаштијата кај жените и девојките, зајакнување на личните капацитети на жените и девојките за конкурентен настап на пазарот на трудот и поттикнување на женското претприемништво.

Повеќе фотографии од настанот може да погледнете овде.

Медиумска покриеност: Актуелно24, Сител, Лидер, Канал5

По повод меѓународниот Ден на жената - 8. март, НСРР организираше трибина на тема „Феминистички теории за политиката и политичката реалност во Македонија“.

Предавач беше доц. д-р Каролина Ристова - Астеруд од Правниот факултет „Јустинијан Први“ во Скопје.

Целта на трибината беше да се одбележи Денот на жената во неговата вистинска смисла, со анализа и дискусија за учеството на жената во сферите на одлучување во општеството. Беше даден осврт на зачетоците на феминизмот, теориите кои му претходеле и правците кои се развивале понатаму. Беше анализирана општествената корист од доследното почитување на женските права, се говореше за принципот меѓу личното и политичкото и други прашања кои отворија простор за понатамошна заложба за организирање на слични трибини.

Атмосферата на трибината ја разубаве „Елена Лука“ со рози кои ги подели на жените и освежување.

Фотографии од настанот може да погледнете овде.

Традиционално, како и секоја година, на 14.01.2014, НСРР заедно со Елена Лука и Комерцијална банка, ја прослави Василица со старите лица во Домот „Мајка Тереза“.

Беше поделена пита со паричка, како и други слатки и солени специјалитети кои ги донесоа активистките. Исто така, активистите од Елена Лука им поделија подароци на штитениците.

Прославата заврши во весел дух, како што е редот, со песна и оро.

Фотографии може да погледнете овде.