Трудот ' Положбата и правата на вработената жена', претставува плод на повеќегодишна работа и истражување на оваа проблематика, конкретно на правата на жената во контекст на правата на човекот воопшто, кои беа поттикнати првенствено од потребите да се претстави материјата не само од аспект на утврдувањето на положбата и правата, туку да се разгледа и процесот на нивното стекнување и остварување. Мотивите за работа врз еден ваков труд, потекнуваат и од потребата за едно подлабоко осознавање на проблематиката за положбата и правата на вработената жена, и тоа како на национален, така и на меѓународен план, преку презентирање на соодветната правна регулатива со која се уредува оваа материја. Положбата и правата на вработената жена спаѓа во редот на оние прашања, кои го надминуваат интересот на поединци- експерти, стручњаци, научници од одделни области, и на одделни држави кои во својата правна регулатива посветуваат посебно внимание на уредувањето на таа положба и тие права. Тоа е прашање кое претставува своевиден предизвик и за севкупната меѓународна заедница и особено за оние меѓународни организации кои уредувањето на положбата и правата на вработената жена ги имаат како императив на севкупната своја активност. Тука најнапред би ги споменале Меѓународната организација на трудот (МОТ) и Организацијата на Обединетите нации (ООН). Потребата од согледување на положбата и правата на вработената жена утврдена со домашното законодавство, а тука во прв ред во фокусот на нашиот интерес, ја имаме Република Македонија, како и на меѓународен план, се наметна како неопходност и од фактот што Република Македонија, со нејзиното осамостојување во деведесетите години, стана рамноправна членка на организациите кои оваа положба и права ги уредуваат на меѓународен план, како и на Советот на Европа, чии активности во оваа област претставуваат едни од нејзините значајни перманентни дејности.
Од друга страна, активното вклучување на Република Македонија во светските и европските организации и во интеграциските процеси, за нас кои со положбата и правата на вработената жена се занимаваме како со проблематика која го надминува не само интересот на запознавање со одредени нејзини аспекти, туку претставува и посебен професионален ангажман, се разбира во контекст на останатите проучувања и ангажмани како универзитетски професор, изработката на овој труд претставуваше и своевиден предизвик, зошто се надеваме дека тој ќе овозможи продлабочено претставување на проблематиката за положбата и правата на вработената жена, како на домашен, така и на меѓународен план. Од друга страна, објавувањето на овој труд го почувствувавме и како еден вид обврска кон пошироката јавност на Република Македонија, која одблиску ги следи светските и европските трендови во областа на правата на човекот воопшто, а во тој контекст и на положбата и правата на жената. Посебна обврска за објавување на овој труд, чувствувавме и кон слушателите на женските студии, кои еве веќе неколку години по ред успешно се организираат и изведуваат во рамките на Сојузот на организациите на жените на Република Македонија, при што, се надеваме и авторот на овој труд како предавач на тие студии токму на проблематиката за положбата и правата на вработената жена, го даде својот скромен придонес.

Авторката
ГЗИМЕ СТАРОВА