Сојузот на организациите на жените на Република Македонија во рамките на своите стратешки определби континуирано работи врз проблематиката на родовата еднаквост и родовата сензибилизација, како основа за креирање на нови и похумани односи во општеството.
Од долгогодишното искуство на СОЖМ, добиено преку работата и комуникацијата со жените од урбаните и од руралните средини, може споредбено да се каже дека во руралните средини е поприсутен традиционалниот, односно патријархалниот модел во организирањето на семејните обврски. Според традиционалните норми и вредности, жените се оние кои најчесто апстинираат од продолжувањето на своето образование во високошколските институции за сметка на домашните обврски, грижата околу децата и слично. Од друга страна, жената вложува труд кој не се вреднува и кој не и обезбедува средства за егзистенција и економска независност. Во овие услови жената ја прифаќа подредената улога која и се наметнува, без можност да учествува во процесот на одлучувањето не само во семејството, туку и пошироко во општеството.
Комлексноста во решавањето на родовите прашања врз основа на горенаведеното бара сеопфатна анализа и иницирање на активности кои ќе доведат до унапредување на родовите односи и истовремено ќе ги надминат постојните предрасуди и стереотипи кои го забавуваат вклучувањето на жените во современите општествени текови.
Целта на проектот "Родов концепт во руралните средини во РМ” е утврдувањето на фактичката состојба на родовиот развој и препознавањето на родовиот идентитет во руралните подрачја во РМ. Иако, овој проект претставува само прва фаза од циклусот предвидени истражувања за родовите односи и родовите улоги во РМ, ќе придонесе да се обликува еден родов извештај кој ќе има поголеми претензии од едноставното презентирање на сознанијата од анкетата во определен миг. Со други зборови, статистичкиот преглед на податоците ќе ги посочи идните насоки на дејствување и последователните активности во прилог на родовата сензибилизација и засилувањето на јавната свест за овие прашања.