Уставот од 1991 година ја промовира еднаквоста на граѓаните што живеат во Република Македонија без разлика на полот. И покрај уставните и нормативните решенија, практиката покажува дека партиципацијата на жената во економскиот и во политичкиот живот е ограничена. Фактори кои ја ограничуваат партиципацијата на жената во економскиот и во политичкиот живот се: сиромаштијата, невработеноста, ниското ниво на образованието, традицијата и др.
Економската рецесија, како и тековните реструктурирања на Републиката имаат несразмерно негативно влијание врз вработувањето на жената. Жената често прифаќа вработување на кое му недостасува долгорочна сигурност или прифаќа работа во опасни работни услови, работи на незаштитено домашно производство или е невработена.